ਤਾਜਾ ਖਬਰਾਂ
ਅਮਰੀਕੀ ਵਿਦੇਸ਼ ਵਿਭਾਗ ਨੇ ਈਰਾਨ ਦੇ ਨਵੇਂ ਸੁਪਰੀਮ ਲੀਡਰ ਮੋਜਤਬਾ ਖਮੇਨੀ ਅਤੇ ਕਈ ਚੋਟੀ ਦੇ ਈਰਾਨੀ ਅਧਿਕਾਰੀਆਂ ਵਿਰੁੱਧ ਇੱਕ ਵੱਡੀ ਮੁਹਿੰਮ ਵਿੱਢ ਦਿੱਤੀ ਹੈ। ਅਮਰੀਕਾ ਨੇ ਆਪਣੇ ‘ਰਿਵਾਰਡਜ਼ ਫਾਰ ਜਸਟਿਸ’ (Rewards for Justice) ਪ੍ਰੋਗਰਾਮ ਤਹਿਤ ਮੋਜਤਬਾ ਖਮੇਨੀ ਅਤੇ ਉਨ੍ਹਾਂ ਦੇ ਸਹਿਯੋਗੀਆਂ ਬਾਰੇ ਸੂਚਨਾ ਦੇਣ ਵਾਲੇ ਨੂੰ 10 ਮਿਲੀਅਨ ਡਾਲਰ (ਲਗਭਗ 83 ਕਰੋੜ ਰੁਪਏ) ਤੱਕ ਦਾ ਇਨਾਮ ਦੇਣ ਦਾ ਜਨਤਕ ਐਲਾਨ ਕੀਤਾ ਹੈ।
ਕੌਣ ਹਨ ਅਮਰੀਕਾ ਦੀ ‘ਹਿੱਟ ਲਿਸਟ’ ਵਿੱਚ?
ਅਮਰੀਕੀ ਵਿਦੇਸ਼ ਵਿਭਾਗ ਵੱਲੋਂ ਜਾਰੀ ਕੀਤੇ ਗਏ ਅਧਿਕਾਰਤ ਪੋਸਟਰ ਵਿੱਚ ਮੋਜਤਬਾ ਖਮੇਨੀ (ਸਵਰਗਵਾਸੀ ਅਯਾਤੁੱਲਾ ਅਲੀ ਖਮੇਨੀ ਦੇ ਪੁੱਤਰ) ਨੂੰ ਮੁੱਖ ਨਿਸ਼ਾਨੇ 'ਤੇ ਰੱਖਿਆ ਗਿਆ ਹੈ। ਅਮਰੀਕਾ ਦਾ ਦੋਸ਼ ਹੈ ਕਿ ਇਹ ਆਗੂ ਈਰਾਨ ਦੇ ‘ਇਸਲਾਮਿਕ ਰੈਵੋਲਿਊਸ਼ਨਰੀ ਗਾਰਡ ਕੋਰ’ (IRGC) ਦੇ ਉਨ੍ਹਾਂ ਹਿੱਸਿਆਂ ਨੂੰ ਨਿਰਦੇਸ਼ਿਤ ਕਰਦੇ ਹਨ, ਜੋ ਵਿਸ਼ਵ ਪੱਧਰ 'ਤੇ ਅੱਤਵਾਦੀ ਗਤੀਵਿਧੀਆਂ ਦੀ ਯੋਜਨਾ ਬਣਾਉਣ ਅਤੇ ਉਨ੍ਹਾਂ ਨੂੰ ਅੰਜਾਮ ਦੇਣ ਵਿੱਚ ਸ਼ਾਮਲ ਹਨ।
ਇਸ ਸੂਚੀ ਵਿੱਚ ਕਈ ਹੋਰ ਪ੍ਰਭਾਵਸ਼ਾਲੀ ਨਾਂ ਵੀ ਸ਼ਾਮਲ ਕੀਤੇ ਗਏ ਹਨ:
ਇਸਮਾਈਲ ਖਤੀਬ: ਈਰਾਨ ਦੇ ਖੁਫੀਆ ਮੰਤਰੀ।
ਅਲੀ ਅਸਗਰ ਹੇਜਾਜ਼ੀ: ਡਿਪਟੀ ਚੀਫ਼ ਆਫ਼ ਸਟਾਫ਼।
ਮੇਜਰ ਜਨਰਲ ਯਾਹੀਆ ਰਹੀਮ ਸਫਾਵੀ: ਸੀਨੀਅਰ ਫ਼ੌਜੀ ਅਧਿਕਾਰੀ।
ਬ੍ਰਿਗੇਡੀਅਰ ਜਨਰਲ ਐਸਕੰਦਰ ਮੋਮੇਨੀ: ਗ੍ਰਹਿ ਮੰਤਰੀ।
ਅਲੀ ਲਾਰੀਜਾਨੀ: ਸੁਪਰੀਮ ਨੈਸ਼ਨਲ ਸਿਕਿਓਰਿਟੀ ਕੌਂਸਲ ਦੇ ਸਕੱਤਰ।
ਗੁਪਤ ਸੂਚਨਾ ਲਈ ਸੁਰੱਖਿਅਤ ਚੈਨਲਾਂ ਦੀ ਵਰਤੋਂ
ਅਮਰੀਕੀ ਪ੍ਰਸ਼ਾਸਨ ਨੇ ਅਪੀਲ ਕੀਤੀ ਹੈ ਕਿ ਜਿਨ੍ਹਾਂ ਵਿਅਕਤੀਆਂ ਕੋਲ ਇਨ੍ਹਾਂ ਨੇਤਾਵਾਂ ਜਾਂ IRGC ਦੇ ਕਮਾਂਡਰਾਂ ਦੇ ਗੁਪਤ ਟਿਕਾਣਿਆਂ ਅਤੇ ਗਤੀਵਿਧੀਆਂ ਬਾਰੇ ਭਰੋਸੇਯੋਗ ਜਾਣਕਾਰੀ ਹੈ, ਉਹ ‘ਟੋਰ ਨੈੱਟਵਰਕ’ ਜਾਂ ਇਨਕ੍ਰਿਪਟਡ ਮੈਸੇਜਿੰਗ ਐਪਸ ਰਾਹੀਂ ਸੰਪਰਕ ਕਰ ਸਕਦੇ ਹਨ। ਵਾਸ਼ਿੰਗਟਨ ਨੇ ਇਹ ਵੀ ਸਪਸ਼ਟ ਕੀਤਾ ਹੈ ਕਿ ਜਾਣਕਾਰੀ ਦੇਣ ਵਾਲਿਆਂ ਦੀ ਪਛਾਣ ਗੁਪਤ ਰੱਖੀ ਜਾਵੇਗੀ ਅਤੇ ਲੋੜ ਪੈਣ 'ਤੇ ਉਨ੍ਹਾਂ ਨੂੰ ਸੁਰੱਖਿਅਤ ਥਾਂ 'ਤੇ ਮੁੜ ਵਸਾਉਣ (Relocation) ਵਿੱਚ ਵੀ ਮਦਦ ਕੀਤੀ ਜਾ ਸਕਦੀ ਹੈ।
ਵਧਦਾ ਤਣਾਅ ਅਤੇ ਰਣਨੀਤਕ ਕਦਮ
ਮਾਹਿਰਾਂ ਦਾ ਮੰਨਣਾ ਹੈ ਕਿ ਅਮਰੀਕਾ ਦਾ ਇਹ ਕਦਮ ਤਹਿਰਾਨ ਦੇ ਲੀਡਰਸ਼ਿਪ ਢਾਂਚੇ ਨੂੰ ਕਮਜ਼ੋਰ ਕਰਨ ਅਤੇ IRGC ਦੇ ਵਿੱਤੀ ਤੇ ਖੁਫੀਆ ਨੈੱਟਵਰਕ 'ਤੇ ਦਬਾਅ ਬਣਾਉਣ ਦੀ ਇੱਕ ਵੱਡੀ ਕੋਸ਼ਿਸ਼ ਹੈ। ਵਾਸ਼ਿੰਗਟਨ ਅਤੇ ਤਹਿਰਾਨ ਵਿਚਕਾਰ ਪਹਿਲਾਂ ਹੀ ਪ੍ਰਮਾਣੂ ਪ੍ਰੋਗਰਾਮ ਅਤੇ ਖੇਤਰੀ ਦਖਲਅੰਦਾਜ਼ੀ ਨੂੰ ਲੈ ਕੇ ਤਣਾਅ ਸਿਖਰ 'ਤੇ ਹੈ, ਅਤੇ ਇਸ ਨਵੇਂ ਐਲਾਨ ਨੇ ਬਲਦੀ 'ਤੇ ਤੇਲ ਪਾਉਣ ਦਾ ਕੰਮ ਕੀਤਾ ਹੈ।
Get all latest content delivered to your email a few times a month.
